Тожикистон кибержиноятчиликка қарши курашиш бўйича халқаро саъй-ҳаракатларга расман қўшилди ва БМТнинг тегишли конвенциясини имзолади. Мамлакат Ташқи ишлар вазирлиги ахборот департаменти хабарига кўра, имзолаш маросими 17 март куни БМТнинг Нью Йоркдаги қароргоҳида бўлиб ўтди.
Мамлакат номидан ҳужжатни Тожикистоннинг БМТдаги доимий вакили Жонибек Ҳикмат имзолади. Мазкур қадам Тожикистоннинг рақамли макон хавфсизлигини таъминлаш борасидаги қатъий позициясини ифодалайди.
БМТнинг кибержиноятчиликка қарши конвенцияси ахборот-коммуникация технологияларидан фойдаланган ҳолда содир этиладиган жиноятларга қарши курашишда халқаро ҳамкорликни кучайтиришга қаратилган. Ҳужжатда қуйидагилар кўзда тутилган:
- оғир жиноятларни тергов қилишда электрон далиллар билан алмашиш механизмларини ишлаб чиқиш;
- кибержиноятларнинг олдини олиш ва ахборот тизимларини ҳимоя қилиш;
- ҳуқуқбузарларни жиноий жавобгарликка тортиш;
- рақамли жиноятларни тергов қилиш соҳасида давлатлараро ҳамкорликни кенгайтириш.
Биринчи универсал халқаро шартнома
Мазкур конвенция аъзо давлатлар ўртасидаги бир неча йиллик музокаралардан сўнг, 2024 йил декабрь ойи охирида БМТ Бош ассамблеяси томонидан қабул қилинган эди. Бу ҳужжат глобал даражада кибержиноятчиликка қарши курашни тартибга солувчи биринчи универсал халқаро шартнома бўлди.
Ҳужжатга кўра, иштирокчи давлатлар киберхавфсизликни таъминлаш ва кибержиноятчиларни таъқиб қилиш бўйича ўз зиммаларига аниқ мажбуриятларни олади.
Конвенция 2026 йил 31 декабрга қадар БМТ қароргоҳида имзолаш учун очиқ туради. Ҳозирги вақтга келиб дунёнинг 75 та давлати ушбу муҳим ҳужжатга қўшилишга улгурди.
