Тошкент шаҳар суди кассация инстансияси қарори билан ижтимоий тармоқларда Gold номи билан танилган Шаҳзод Узоқовга нисбатан тайинланган озодликни чеклаш жазоси озодликдан маҳрум қилиш жазосига ўзгартирилди. Бу ҳақда суд расмий баёнот билан чиқди.
Маълум қилинишича, 2025 йил 7 ноябрь куни жиноят ишлари бўйича Олмазор тумани суди Узоқов ва Н.Қулдошевни безориликда айбдор деб топиб, уларга 3,5 йилдан 4 йилгача озодликни чеклаш жазоси тайинлаган. Терговда аниқланишича, улар йўл талашиш ортидан келиб чиққан жанжалда фуқарога нисбатан куч ишлатган, ажратмоқчи бўлган яна бир шахсни ҳам уриб, тан жароҳати етказган ҳамда воқеа жойидан яширинган. Ҳодиса давомида жабрланувчининг қимматбаҳо телефони ҳам шикастланган.
Кассация инстансияси судлов ҳайъати жиноят квалификацияси тўғри берилганини тан олган ҳолда, тайинланган жазо турига рози бўлмади. Судланувчиларнинг аввал ҳам шундай турдаги жиноятлар учун жавобгарликка тортилгани, шунингдек, улар профессионал MMA спортчилари экани инобатга олиниб, уларнинг жисмоний устунлиги ва масъулияти юқори бўлиши кераклиги алоҳида таъкидланди.
Шу асосда биринчи инстансия ҳукми бекор қилиниб, ҳар икки шахсга нисбатан 3,5 йил озодликдан маҳрум қилиш жазоси тайинланди ва улар суд залидан қамоққа олинди. Суд уларнинг аввал ўтаган муддатлари янги жазодан чегириб ташланишини ҳам белгилади. Қайд этилишича, ушбу баёнот якуний хулоса эмас ва томонлар белгиланган тартибда шикоят киритиш ҳуқуқига эга.
