Ўзбекистонда Apple Pay ва Google Pay тўлов тизимлари ишга туширилиши режалаштирилмоқда.
Шавкат Мирзиёев Вашингтонга амалий ташрифи давомида АҚШнинг етакчи компаниялари, инвестиция фондлари ва молия институтлари вакиллари билан учрашув ўтказганди. Унда Ўзбекистонда Apple Pay ва Google Pay тўлов тизимларини жорий этиш режаси ҳам маълум қилинди.
Шунингдек, Рақамли академия ва стартап-ҳаблар тармоғини яратиш ҳам кўзда тутилган. Ўзбекистон АҚШ техногигантлари билан лойиҳаларни молиялаштиришга DFC ва АҚШ Эксимбанкини жалб қилади.
Ўзбекистонда Apple Pay ва Google Pay тўлов тизимларини ишга тушириш режаси 2024 йилда маълум қилинганди. Вазирлар Маҳкамаси қарори билан Марказий банк, Рақамли технологиялар вазирлиги, Туризм қўмитасига Apple Pay, Google Pay, Paypal, Alipay, UniPay каби халқаро онлайн тўлов компаниялари билан музокара ўтказиб ушбу воситаларни Ўзбекистондаги тўлов тизимлари ва банк хизматларига улашни йўлга қўйиш, зарур ҳолларда миллий қонунчилик талабларини қайта кўриб чиқиш бўйича таклифлар киритиш топширилганди.
2025 йилнинг ёзида TBC Uzbekistan бош директори Ника Курдиани Apple Pay ва Google Pay булутли хизматларни чекловчи шахсий маълумотлар тўғрисидаги қонун туфайли Ўзбекистон бозорига кира олмаётганини айтганди.
