Украина икки ойлик ўт очишни тўхтатиш шарти билан сайлов ўтказишга тайёр. Бу ҳақда президент Владимир Зеленский Мюнхен хавфсизлик конференциясидаги нутқида маълум қилди.
“Бизга икки ойлик танаффус беринг ва биз сайлов ўтказамиз, шу холос. Бизга сулҳ беринг, хавфсизлик, инфратузилма таъминланг… тайёргарлик кўриш учун кўп кун керак”, деди у.
Зеленскийнинг айтишича, бундай сулҳга АҚШ Россияга босим ўтказиши орқали эришиши мумкин.
“Путинга босим ўтказинг, сулҳга эришинг. Шунда парламентимиз қонунни ўзгартиради, керак бўлса, сайловларга борамиз. Агар америкалик ва россияликлар Украинада сайлов ўтказилишига муҳтож бўлса, биз бунга очиқмиз”, деди сиёсатчи.
У Украинадаги ҳозирги вазиятни тарихий мисоллар, хусусан, Линкольн давридаги АҚШдаги сайлов билан таққослаш баллистик зарбалар хавфи туфайли нотўғри эканини таъкидлади.
“Буни қандай таққослаш мумкин? Халқимиз ракеталар ҳужуми остида. Бу кўплаб ракеталар билан олиб борилаётган уруш. Биз баллистик ҳужумлар остидамиз”, дея таъкидлади Зеленский.
Шунингдек, у олдинги сафдаги ҳарбийлар ҳам албатта овоз бериш ҳуқуқига эга бўлиши кераклигини қўшимча қилди.
“Аскарларимизга ҳаётимизни, мамлакатимизни ҳимоя қилиш ва шу билан бирга овоз бериш имкониятини бериш керак. Бу мураккаб нарса”, деди Зеленский.
Шунингдек, у агар Россия ўзида сайлов ўтказишни истаса, Украина ҳам “руслар учун шундай сулҳ” эълон қилиши мумкинлигини таъкидлади. Украина қонунларига кўра, ҳарбий ҳолат даврида президент ва парламент сайловларини ўтказиш тақиқланади. Россия босқини сабабли мамлакатда бу сайловлар белгиланган муддатларда ўтказилмади. Россия ҳукумати эса бундан фойдаланиб, Зеленскийнинг “ноқонунийлиги” ҳақида баёнотлар бериб келмоқда.
2025 йил декабрида АҚШ президенти Дональд Трамп тинчлик музокаралари фонида Украина президентлик сайловини ташкил этиш “вақти келганини” айтганди. Ўшанда Зеленский АҚШ ва Европа хавфсизликни таъминласа, 60–90 кун ичида сайлов ўтказишга тайёрлигини билдирган.
Февраль ойида Financial Times манбаларга таяниб, Зеленский президентлик сайлови ва референдумни Россия билан уруш бошланганининг тўрт йиллиги — 24 февраль куни эълон қилиши мумкинлигини ёзган эди. Украина президенти эса бунга жавобан “бу ҳақда биринчи марта эшитаётгани”ни қайд этган.
