Андижонда қарийб ярим кило олтин қуймаларини яширинча Қирғизистонга олиб ўтмоқчи бўлган аёл ва унинг қизи тўхтатиб қолинди. Бу ҳақда Давлат хавфсизлик хизмати хабар берди.
Балиқчи туманида яшовчи, 1985 йилда туғилган аёл ва унинг 2006 йилда туғилган қизи умумий баҳоси 819 миллион сўмни ташкил этувчи, 7 дона ностандарт шаклдаги, жами 473 грамм олтин қуймаларни кийимлари остига яширган ҳолда Хўжаобод туманидаги “Дўстлик” чегара божхона пости орқали Қирғизистонга олиб ўтмоқчи бўлган вақтларида тўхтатиб қолинган.
Ҳозирда қонунбузарларга нисбатан Жиноят кодексининг 182-моддаси (божхона тўғрисидаги қонунчиликни бузиш) 2-қисми “а” банди билан жиноят иши қўзғатилиб, тергов ҳаракатлари олиб борилмоқда.
Ушбу моддага кўра, Божхона тўғрисидаги қонунчиликни жуда кўп миқдорда бузиш БҲМнинг 300 бараваридан 600 бараваригача (123,6 млн сўмдан 247,2 млн сўмгача) миқдорда жарима ёки 3 йилгача ахлоқ тузатиш ишлари ёхуд 5 йилдан 8 йилгача озодликдан маҳрум қилиш билан жазоланади.
