Андижон вилоятининг туманларидан биридаги Кадастр бўлими бошлиғи ер ажратиш эвазига 3 минг доллар пора олди. Бу ҳақда Давлат хавфсизлик хизмати хабар берди.
Маълум қилинишича, Кадастр бўлими бошлиғи 1959 йилда туғилган фуқарога уй-жой қуриши учун 8 сотих ва деҳқон хўжалиги ташкил қилиши учун 17 сотих ер ажратиб бериш эвазига муқаддам 3 минг АҚШ доллари олган.
Шунингдек, у фуқарога 8 сотих ер ажратилганлиги ҳақида сохта ҳужжат расмийлаштириб берган.
Жорий йилнинг январь-февраль ойларида ўтказилган хатлов жараёнида ушбу ер майдони ноқонуний ажратилганлиги аниқланиб, фуқарога нисбатан 82 млн сўм жарима қўлланилган.
Кадастр мансабдори эса 3 минг АҚШ долларини учинчи шахс орқали қайтариб берган вақтида фош этилган.
Ҳозирда ҳолат юзасидан жиноят иши қўзғатилиб, тергов ҳаракатлари олиб борилмоқда.
