Бугун, 1 декабрдан бошлаб Туркманистон Марказий банки 200 манатлик купюрани муомалага киритди. Бу ҳақда “Turkmen portal” хабар берди.
Қайд этилишича, янги банкнотанинг муомалага чиқарилиши Туркманистон бетарафлик мақомини олганининг 30 йиллигига бағишланган. Купюра полимер материалдан тайёрланган. Марказий банк маълумотига кўра, унинг олд томонида Арқадағ монументи, орқа томонида эса Арқадағ шаҳри ҳокимлиги биноси тасвирланган.
Шу билан бир вақтда 1, 5 ва 10 манатлик янгиланган полимер банкноталар ҳам муомалага киритилган. Умуман олганда уларнинг ранги ва дизайни сақлаб қолинган, бироқ 2025 йилни Туркманистон ҳукумати “Халқаро тинчлик ва ишонч йили” деб эълон қилгани сабабли янги белги қўшилган.
Қайд этилишича, янги купюраларнинг асосий хусусиятлари – уларнинг сохталаштиришдан юқори даражада ҳимоялангани ва ташқи таъсирларга, яъни ифлосланиш, эскириш, шикастланиш ва бошқа омилларга нисбатан чидамлилиги ҳисобланади. Шунингдек, ҳимоя элементлари кучайтирилган ва купюранинг ҳақиқийлигини тасдиқловчи визуал белгилар яхшиланган. 2009, 2012, 2014, 2017 ва 2020 йиллардаги барча банкноталар Туркманистон ҳудудида қонуний тўлов воситаси бўлиб қолади.
Маълумот учун, туркман манатининг расмий курси кўп йиллардан бери бир доллар учун 3,5 манат даражасида ушлаб келинади. Қора бозор ёки ҳақиқий курс эса бир доллар учун 19-20 манатни ташкил қилади.
