Жиноят ишлари бўйича Бекобод шаҳар судида Россия Қуролли кучлари сафида ёлланма хизматчи сифатида Россия-Украина урушида қатнашган 19 ёшли йигитга суд ҳукми ўқилди.
Судда таъкидланишича, 2006-йилда Бекобод шаҳрида туғилган Д.X. 2025-йилнинг 23 май куни ишлаш мақсадида Россия Федерациясига кетган. Уни Москва вилоятида онаси ва укаси кутиб олган ҳамда биргаликда Пушкино шаҳрида вақтинча яшаб, “Ozon” омборида ишлашган. Бироқ июль ойида корхона маъмурияти томонидан омборда фақат Россия фуқаролари ишлаши ҳақидаги янги тартиб жорий этилгач, барчаси ишсиз қолган.
Шундан сўнг Д.X. интернет орқали иш қидириб, “Москвада иш бор” каналида эълон қолдирган андижонлик Акбар исмли шахс билан танишган. Акбар унга телефон орқали Владивостокда ҳайдовчилик бўйича иш борлигини, ойига 100–150 минг рубль маош берилишини ваъда қилган. У манзилга етиб бориши учун чипта ҳам олиб берган. Д.X. онасининг қаршилигига қарамасдан яширинча Владивостокка кетган.
Владивостокка етиб келганида Акбар Telegram орқали аэропорт яқинида турган “Toyota аква” русумли автомашинани бошқариб, шаҳар марказидаги меҳмонхонага жойлашган. У ерда уч кун яшаб, тўртинчи куни аэропорт яқинида Артём исмли шахсдан “гречка”, яъни психотроп моддаларни олиб, Находка шаҳрига Азиз исмли шахсга олиб бориш бўйича топшириқ берилган. Шундан кейин у доимий равишда психотроп моддаларни етказиб бериш билан шуғулланган.
2025 йил 19 август куни 5 килограмм 400 грамм психотроп моддани белгиланган манзилга олиб бораётганида, Россия ҳуқуқни муҳофаза қилувчи органлар томонидан қўлга олинган. Тергов давомида Уссурийск шаҳридаги 2-сонли тергов ҳибсхонасига жойлаштирилган. Бу ерда унга ва бошқа жазони ўтаётган ўзбекистонликларга Россия мудофаа ходимлари Украинага қарши урушга бориш таклифини билдиришган. Уларга бунинг эвазига жиноий жазодан озод этилиш ваъда қилинган.
“Бир неча маротаба таклифларига рози бўлмадим. Кейин сурхондарёлик таржимон йигит Украинага қарши урушга рози бўлишим лозимлигини, бўлмаса қамалишимни, умрбод қамоқдан чиқолмаслигимни тушунтирди. Узоқ ўйлангач, қамалиб кетишдан қўрқиб, боришга розилик бердим. Ҳозир қилган ишимдан қаттиқ пушаймонман”, дея кўрсатув берган Д.X. суд мажлисида.
Шундан кейин у мудофаа бўлими билан шартнома имзолаган ҳамда Уссурийскдаги ҳарбий қисмга юборилган. У ерда 200 нафардан ортиқ турли давлат фуқаролари билан бирга 14 кунлик ҳарбий тайёргарликдан ўтган. Запорожье вилоятидаги полигонда жанговар машғулотларда қатнашиб, танк ўқловчиси вазифасини бажарган. Бунинг учун ойига ўртача 250 минг рубль маош олган.
Ҳарбий тайёргарлик вақтида у кўричак сабабли госпиталга тушиб, Ростов шаҳрида операция қилинган. 9 кун даволангандан сўнг, дўконга чиқиш баҳонасида такси орқали Москвага қочиб, онаси ва укасининг олдига етиб келган ҳамда 2025 йил 31 октябрь куни Ўзбекистон элчихонасига бориб, ватанга қайтиш гувоҳномаси орқали Ўзбекистонга келган.
Суд ҳукми билан Д.X. Жиноят кодексининг 154-моддаси 1-қисми билан айбли деб топилди. Унга нисбатан 5 йил муддатга озодликдан маҳрум қилиш жазоси тайинланди.
