Ўзбекистон Жаҳон савдо ташкилотига аъзо бўлиши жараёнида Россия билан икки томонлама музокараларни якунлади. Бу ҳақда президентнинг ЖСТ масалалари бўйича вакили Азизбек Ўрунов маълум қилди.
Унинг билдиришича, 21 декабрь куни Шавкат Мирзиёевнинг Санкт Петербург шаҳрига амалий ташрифи доирасида, Россия иқтисодий ривожланиш вазири Максим Решетников билан бирга Ўзбекистоннинг Жаҳон савдо ташкилотига аъзо бўлиш жараёни доирасида бозорга кириш бўйича икки томонлама музокараларни якунловчи баённома имзоланди.
More stories“Баъзи ишлар ҳали бажарилиши керак бўлса-да, биз энди кўп томонлама музокаралар, зарур қонунчилик ўзгаришларини амалга ошириш ва келгуси йилда аъзолик жараёнини муваффақиятли якунлашга бутун эътиборимизни қаратамиз”, деб ёзди у у LinkedIn’да.
Азизбек Урунов 2025-йилнинг ноябрида ЖСТга аъзолик бўйича Россия билан музокаралар деярли якунланганини, барча муҳим элементлар мувофиқлаштирилиб якуний текширув ва тасдиқлашни талаб қиладиган бир нечта техник жиҳатлар қолганини билдирганди.
Ўзбекистоннинг ЖСТга аъзо бўлиш ҳаракатлари
Бу 1994-йилдан бошланган. 1998-йилда жараённи амалга ошириш бўйича махсус ишчи гуруҳ тузилган. Лекин номаълум сабабларга кўра аъзолик ишлари суст кечган. 2005 йил ўрталарига келиб, халқаро экспертлар билан учрашувлар тўхтаб қолган. 2020 йил июль ойида жараён яна жонланиб, ишчи гуруҳнинг тўртинчи йиғилиши ўтказилган. Кейин 2022 йил июнь, 2023 йил март ва 2023 йил ноябрь ойларида учрашувлар бўлиб ўтган.
Ўзбекистон 2026-йилгача Жаҳон савдо ташкилотига аъзо бўлмоқчи. Давлат раҳбарининг алоҳида назорати асосида 2023-йилдан бошлаб ушбу ташкилотга аъзо бўлиш чоралари кўрилмоқда. 2025 йил май ойида ўтказган йиғилишда Ўзбекистоннинг ЖСТга аъзо бўлиш жараёнини жадаллаштириш бўйича топшириқ берганди. Шавкат Мирзиёев Ўзбекистоннинг ушбу ташкилотга аъзо бўлиши чуқур ўйланган ва узоқни кўзлаган танлов эканлигини таъкидлаганди.
