Италиянинг Торре Лапилло шаҳрида яшовчи 57 ёшли фуқаро тасодифан 20 та олтин қуймасини чиқиндига ташлаб юборди. Бу ҳақда RMF24 хабар берди.
Маълум қилинишича, эркак олтин қуймаларни бутун умри давомида йиғиб келган. Қиймати 120 минг евро бўлган қуймалар эркак томонидан тунука қутида сақланган. Эркак уни чиқинди билан бирга бакка ташлаб юборган ва фақат эртаси куни нима қилганини англаб етган.
Жабрланувчи ёрдам сўраб, полицияга мурожаат қилган. Ходимлар аввалига унга ишонмаган, аммо кузатув камераларидаги ёзувларни кўриб, эркак алдамаётганига амин бўлган.
Полиция ходимлари чиқинди қутилари ичидаги нарсалар аллақачон қўшни Угенто шаҳридаги чиқиндихонага олиб кетилганини аниқлаган. Ҳуқуқни муҳофаза қилувчи органлар у ерда қидирув ишларини ташкил этган ва натижада олтин қуймалар солинган қути топилган.
