Самарқанд вилоятининг Жомбой туманида маст ҳолдаги Gentra ҳайдовчиси йўл четида турган бошқа Gentra’га урилиб, уни бир неча метрга судраб борди. Ҳодиса 3 нафар боланинг ҳаётига жиддий хавф туғдирган. Мазкур ҳолат бўйича вилоят Йўл ҳаракати хавфсизлиги бошқармаси муносабат билдирди.
Ижтимоий тармоқларда Жомбой туманида иккита Gentra русумли транспорт воситалари иштирокидаги йўл-транспорт ҳодисаси акс этган видео тарқалди. Видеода қора Gentra йўл четида тўхтаб турган оқ Gentra’ни уриб, уни бир неча метрга судраб борганини, шунингдек, шу ерда ўйнаётган болаларнинг ҳаётига жиддий хавф туғдирганини кўриш мумкин.
Маълум бўлишича, ҳолат туманнинг “Самарқанд” маҳалласидаги ички йўлда содир бўлган. Қора Gentra ҳайдовчиси юқори тезликда бориб, оқ Gentra’нинг орқа қисмига урилган ва йўл четида турган ҳайдовчини ҳам уриб юборган. Ҳодиса оқибатида иккала ҳайдовчи шифохонага ётқизилган. Текширувлар давомида қора Gentra ҳайдовчиси маст ҳолатда бўлгани аниқланган.
“Тан оламан. “Вообше” спирт билан рулга ўтирмасликни сўраб қолардим”, дейди қора Gentra ҳайдовчиси.
Шунингдек, ҳолат бўйича болаларнинг онаси ҳам гапириб, жуда қўрқиб кетганини билдирган.
“Бирдан ёмон овозлар эшитилиб кетди. Мен жуда ҳам ёмон аҳволга тушдим. Болаларим, деб югуриб чиқдим. Дарвозани олдидаги қизим ичкарига отилиб кириб кетди, ая деб. Уни кўриб, кўнглим жойига тушди. Ҳалиям худо бир асрабди”, дейди она.
Ҳолат юзасидан ҳужжатлар расмийлаштирилиб, тўпланган ҳужжатлар жиноий ишлар бўйича Жомбой туман судига юборилиши айтилган.
Билдирилишича, ҳолат юзасидан ҳужжатлар расмийлаштирилиб, Жиноят ишлари бўйича Жомбой туман судига юборилади ва ушбу шахс ҳайдовчилик гувоҳномасидан маҳрум этилади.
