Ливаннинг шарқидаги Баалбек ҳудудида амалга оширилган Исроил авиазарбалари оқибатида “Ҳизбуллоҳ”нинг саккиз нафар аъзоси ҳалок бўлди. Исроил ҳужумлар “амалиёт ўтказаётган қўмондонлик марказлари”га қаратилганини билдирмоқда. Бу ҳақда “Euronews” хабар берди.
Қайд этилишича, воқеа кеча, 20 февраль куни Райак қишлоғи яқинидаги тураржой биносида содир этилган. Уч қаватли иншоотнинг юқори қисми вайрон бўлган. “Ҳизбуллоҳ” манбалари қурбонлар орасида маҳаллий даражадаги қўмондонлар — Али ал-Муссавий, Муҳаммад ал-Муссавий ва Ҳусейн Яғий борлигини айтган.
Исроил Мудофаа кучлари (ЦАХАЛ) эса баёнотида нишонга олинган шахслар “Исроилга қарши ўқ узиш ва ҳужумларни режалаштираётган, гуруҳнинг тайёргарлик ва куч жамлаш жараёнини тезлаштираётган” аъзолар бўлганини таъкидлаган. Тель-Авив бу ҳаракатларни Ливан билан тузилган келишувларни бузиш деб баҳоламоқда.
Ливан Соғлиқни сақлаш вазирлиги маълумотига кўра, жами 10 киши ҳалок бўлган, улар орасида уч нафар бола ҳам бор. Яна 20 дан ортиқ одам жароҳат олган. Райак шифохонаси шифокорлари қурбонлар орасида Сурия ва Эфиопия фуқаролари ҳам бўлганини билдирган.
Ҳужумлар минтақада кескинлик кучайган бир пайтга тўғри келган. АҚШ Эрон билан ядровий музокаралар муваффақиятсиз тугаса, ҳарбий чоралар кўрилиши мумкинлигини урғулаган. Ислом Республикаси эса “Ҳизбуллоҳ” ва ҲАМАСнинг асосий қўлловчиларидан бири ҳисобланади.
2024 йил ноябридан бери ўт очишни тўхтатиш келишуви амал қилса-да, Исроилнинг Ливандаги зарбалари деярли ҳар куни кузатилмоқда. Тель-Авив уларни “Ҳизбуллоҳ”нинг қайта қуролланишини тўсишга қаратилган деб изоҳлайди. Ливан ҳукумати эса сулҳдан кейин ҳам ўнлаб тинч аҳоли ҳалок бўлганини таъкидламоқда.
