Россия Visa ва Mastercard карталарини босқичма-босқич муомаладан чиқаради. Бу ҳақда мамлакатдаги барча ички тўловларни амалга оширадиган Миллий тўлов карталари тизими (NSPK) маълум қилди.
Ушбу мақсадга эришиш учун халқаро тўлов тизимлари карталари учун банклараро комиссия (интерчейнж) ставкаларини пасайтириш режалаштирилган. Гап банкларнинг бу карталар орқали амалга оширилган савдолардан кўрадиган фойдасини чеклаш ҳақида бормоқда.
2027 йил бошидан комиссия ставкасини 1 фоизгача пасайтириш, 2028 йил бошидан эса бутунлай нолга тушириш (бекор қилиш) кўзда тутилган. Шу тариқа, Россия банклари учун Visa ва Mastercard карталари билан ишлашни давом эттириш иқтисодий жиҳатдан мутлақо фойдасиз бўлиб қолади.
Visa ва Mastercard Россияни тарк этган илк даврларда NSPK уларнинг карталари учун банклараро комиссия ставкасини ўзгартирмай турганди. Ўшанда бундай қарор Россия банкларига карта эгалари учун амалдаги кешбэк, бонус ва кредит дастурларини сақлаб қолиш имконини бериши айтилган.
Украинага қарши уруш бошлангач, хорижий тўлов тизимлари мамлакатдан чиқиб кетди. Шундан сўнг Россия банклари аҳоли қўлидаги Visa ва Mastercard карталарининг амал қилиш муддатини мажбуран узайтирди ёки уларни муддатсиз қилиб қўйди.
