Сурхондарё вилоятининг Термиз туманида 10-синф ўқувчиси бошқарувидаги Cobalt автомобили иштирокида ЙТҲ содир бўлди. Бу ҳақда вилоят ЙҲХБ хабар берди.
Ҳодиса 9 октябрь куни соат тахминан 13:00 да Термиз туманининг Наврўз маҳалласи ҳудудидан ўтувчи Термиз шаҳри — Намуна — Термиз халқаро аэропорти автомобил йўлининг 11-километрида юз берган.
Дастлабки суриштирувларга кўра, 2010 йилда туғилган, Термиз шаҳридаги 25-мактабнинг 10-синф ўқувчиси ҳайдовчилик ҳуқуқига эга бўлмаган ҳолда онасига тегишли Cobalt автомобилини юқори тезликда бошқарган.
Ўқувчи бошқарувни йўқотиб, йўлнинг ўртасига ўрнатилган ёритиш устунига бориб урилган.
Оқибатда автомобил салонида бўлган, 2010 йилда туғилган синфдоши воқеа жойида ҳалок бўлган. Ҳайдовчи эса оғир тан жароҳатлари билан шифохонанинг жонлантириш бўлимига етказилган.
Ҳолат юзасидан Термиз тумани ички ишлар бўлими тергов гуруҳи томонидан жиноят иши қўзғатилган.
Ҳодисадан сўнг ҳудуддаги 23, 24 ва 25-мактабларнинг транспорт воситаларини бошқаришга мойиллиги бўлган ўқувчилари ҳамда уларнинг ота-оналари иштирокида муҳокама йиғилиши ўтказилган.
Йиғилишда вояга етмаганлар иштирокидаги йўл-транспорт ҳодисаларининг сабаблари муҳокама қилиниб, ота-оналар ва жамоатчиликнинг бефарқлиги, болаларнинг назоратсиз қолаётгани танқид қилинган.
