Россияга визасиз тартибда келувчи хорижликлар ўз ташрифи ҳақида олдиндан хабарнома юбориши мажбурий этиб белгиланиши мумкин. Россия Ички ишлар вазирлиги тегишли қонун лойиҳасини ишлаб чиқди. Бу ҳақда вазирлик расмий вакили Ирина Волк маълум қилди.
Волкнинг сўзларига кўра, 2025 йил 30 июндан бошлаб чет элликлар ушбу хабарномани синов тариқасида юбориш имкониятига эга бўлган. Эндиликда эса бу тартиб мажбурий этиб белгиланиши кутилмоқда.
Бундан ташқари, қонун лойиҳаси билан 2028 йил 1 январдан миграция карталарини тўлдиришни бекор қилиш таклиф этилмоқда. Бу қарор федерал ижро ҳокимияти органлари ўртасида маълумотлар алмашинуви электрон шаклга ўтгани ва “Чет эл фуқаросининг рақамли профили” ресурси яратилаётгани билан изоҳланмоқда.
Ирина Волкнинг сўзларига кўра, ушбу чоралар мигрантларнинг Россияда бўлишини тегишли даражада назорат қилиш имконини беради. Миграция карталарининг бекор қилиниши эса турли идоралар хизмати такрорлашига чек қўяди.
