Озарбайжон президенти Илҳом Алиевнинг оиласига шантаж қилиб, 5 миллион евро талаб қилган блогерлар қўлга олинди. Бу ҳақда Оху.аз хабар берди.
Маълум қилинишича, Озарбайжонда хорижда яшовчи блогерлар иштирок этган кенг кўламли шантаж ва туҳмат кампанияси фош этилган. Жумладан, Меҳман Ҳусейнов, Эмин Ҳусейнов ва Габил Мамедов каби блогерлар турли платформаларда Алёна Алиевага (Озарбайжон президентининг келини) нисбатан туҳмат материалларини тарқатган.
М. Ҳусейнов жонли эфирлардан бирида сохта видеоёзувларни намойиш этган. Бундан ташқари, мамлакат ташқарисида бўлган номаълум шахс хорижий телефон рақамлари ва электрон почта орқали Озарбайжоннинг юқори лавозимли амалдорлари билан боғланиб, уларга шантаж қилган.
“Жиноятчи гўёки Алёна Алиева иштирокидаги видеоматериаллар борлигини айтиб, уларни тарқатмаслик эвазига 5 млн евро талаб қилган”, дейилади хабарда.
Озарбайжон Давлат хавфсизлик хизмати ушбу ҳолат юзасидан Жиноят кодексининг тегишли моддалари бўйича жиноий иш қўзғатган. Ўтказилган операция натижасида гумонланувчи қўлга олинган. Тергов жараёнида у айбига иқрор бўлиб, иш бўйича батафсил кўрсатма берган.
