Халқаро археологлар гуруҳи Мексика жунглиларида илгари номаълум бўлган, олимларнинг ҳисоб-китобларига кўра, минг йилдан ортиқ вақт давомида яширин бўлиб келган Майя цивилизациясига тегишли шаҳарни топди. Бу ҳақда “Mirror” хабар берди.
Қайд этилишича, ушбу топилма Кампече штатидаги Калакмуль биосфера қўриқхонасида словениялик ва мексикалик тадқиқотчиларнинг қўшма экспедицияси давомида аниқланган. Янги археологик ёдгорликка юкатек майялари тилида “йўл йўқ” деган маънони англатувчи Минанбе номи берилган. Бундай ном қадимий шаҳар жойлашган ҳудудга ўтиш жуда қийин бўлганлиги сабабли танланган.
Экспедицияга Словения фан ва санъат академияси Илмий-тадқиқот маркази археологи Иван Шпрайц раҳбарлик қилган. Дала ишларидан олдин мутахассислар ҳудуднинг лазерли сканерлаш (LiDAR) маълумотларини ўрганиб чиққан. Ушбу маълумотлар қалин жунгли қоплами остида сунъий иншоотлар мавжуд бўлиши мумкинлигини кўрсатган.
Текширув давомида археологлар майдони тахминан 13 гектарни ташкил этувчи шаҳарни аниқлаган. Дастлабки маълумотларга кўра, у милоднинг 600 ва 900 йиллари оралиғидаги даврда барпо этилган. Минанбе ҳудудида кўплаб иншоотлар, жумладан, Рио-Бек архитектура услубидаги 13 метрли пирамида, шунингдек, сув рамзлари ва бошдан жудо қилиш саҳналари тасвирланган тош рельефлар сақланиб қолган.
Экспедиция иштирокчиларининг сўзларига кўра, шаҳар деярли шикастланмаган ҳолатда топилган. Кўплаб бошқа майя ёдгорликларидан фарқли ўлароқ, бу ерда талон-торож қилиш излари аниқланмаган, бу эса топилманинг археологлар учун қийматини янада оширади. Олимларнинг фикрича, Минанбе иқтисодиёти қишлоқ хўжалигига асосланган муҳим минтақавий марказ бўлган.
