Ўзбекистонлик оғир атлетикачи, уч карра жаҳон чемпиони Акбар Жўраев президент совғаси — BYD автомобили ҳамда бир марталик пул мукофоти билан тақдирланди. Бу ҳақда Миллий олимпия қўмитаси хабар бермоқда.
Жўраев яқинда Норвегияда ўтган Жаҳон чемпионатида 110 килогача бўлган вазн тоифасида жаҳон чемпиони бўлганди. У даст кўтариш машқида 196 кг натижа билан жаҳон рекордини ўрнатди.
Бу Жўраевнинг учинчи марта жаҳон чемпиони бўлишидир. Бунгача у 2021 йил Тошкентда ва 2023 йил Ар Риёдда ўтказилган турнирларда ҳам ғолиб чиққанди.
Шунингдек, Норвегиядаги баҳсларда Руслан Нуриддинов 2 та бронза медалини қўлга киритди. Нуриддинов ва спортчиларнинг мураббийларига ҳам пул мукофоти топширилган.
2–11 октябрь кунлари Норвегиянинг Форде шаҳрида ўтказилган ушбу мусобақада 87 мамлакатдан 500 дан ортиқ спортчи иштирок этди.
Ўзбекистон терма жамоаси сафида мусобақада икки нафар спортчи — Акбар Жўраев ва Руслан Нуриддинов қатнашди. Оғир атлетика федерацияси матбуот хизмати берган маълумотга кўра, улар медаллар жамғаришда ажойиб натижа кўрсатиб, умумжамоа ҳисобда кучли бешликдан жой олди.
