Сербия ўз тарихида биринчи марта НАТО билан ҳамкорликдаги ҳарбий ўқув машғулотларига киришди. Машғулотлар жорий йилнинг 23 майигача давом этади. Унда Сербия, Италия, Руминия ва Туркиядан жами 600 нафар ҳарбий хизматчи иштирок этмоқда. Бу ҳақда мамлакат Мудофаа вазирлиги хабар берди.
Қайд этилишича, жараённи Шимолий Атлантика альянсига аъзо бир қанча давлатлар, жумладан, АҚШ, Буюк Британия, Франция ва Германия кузатувчилари кузатиб бормоқда. Ўқув машғулотлари мамлакат жанубидаги Буяновац шаҳри яқинида жойлашган “Боровац” полигонида ўтказилмоқда. Улар тактик характерга эга бўлиб, асосий мақсад тажриба алмашишдир.
“Икки ҳафталик дала ўқув машғулотлари давомида тинчликпарвар операцияларда қўлланиладиган тактика, услуб ва тартиблар, масалан, база хавфсизлигини таъминлаш, назорат-ўтказиш пунктларида ишлаш, оммавий йиғилишларни назорат қилиш ва шаҳар шароитидаги жанглар машқ қилинади”, дея қайд этган Сербия ҳарбий идораси.
Вазирлик, шунингдек, ушбу манёврлар Сербия ва НАТО ўртасидаги “Тинчлик йўлида ҳамкорлик” дастури доирасидаги “ўзаро манфаатли, аниқ ва шаффоф ҳамкорлик”нинг давоми эканини қўшимча қилган. Шу билан бирга, альянс мамлакатнинг ҳарбий бетарафлигини ҳурмат қилиши таъкидланган.
Сербия Президенти Александр Вучич жорий йилнинг март ойида миллий ривожланиш стратегиясини тақдим этар экан, НАТО билан қўшма машғулотлар ўтказилиши ҳақида эълон қилган. У ушбу машғулотлар “тинчлик ва барқарорликни сақлашга, мамлакат хавфсизлигини таъминлашга” хизмат қилишини таъкидлаган. Шунингдек, Белград ўз ҳарбий бетарафлигини қатъий сақлашини ва барча билан яхши муносабатлар қуришини қайд этган.
Маълумот учун, 2022 йилнинг март ойида Вучич Сербия Югославиянинг бомбардимон қилинишини унутмагани сабабли НАТОга аъзо бўлмаслигини айтган. 1999 йил 24 мартда НАТО БМТ Хавфсизлик Кенгашининг рухсатисиз мамлакатга қарши “Иттифоқчи кучлар” ҳарбий операциясини бошлаган. Бомбардимонлар 78 кун давом этган. Белград маълумотларига кўра, ҳужумлар оқибатида қарийб 2 минг киши ҳалок бўлган, етказилган зарар эса 542 миллиард долларни ташкил этган.
