Жиззахда йўлдан ўтаётган вояга етмаган қиз катта тезликда келаётган автомобиль уриб юборишидан вафот этди.
Ижтимоий тармоқларда ҳолат акс этган видео тарқалгач, Жиззах вилояти ЙҲХБ матбуот хизмати ушбу ЙТҲ 2025 йил 7 декабрь куни Жиззах шаҳрида содир бўлганини маълум қилди. Тарқалган видеода йўлни пиёдалар ўтиш жойидан кесиб ўтаётган икки қиздан бирини катта тезликда келган автомобиль уриб, учириб юборганi акс этган.
Вояга етмаган пиёда оғир тан жароҳати олган. Жароҳатланган қиз шифохонага ётқизилган бўлса-да, 2025 йил 20 декабрь куни вафот этган.
Дастлабки маълумотларга кўра, ҳодиса ҳайдовчи томонидан йўл ҳаракати қоидалари бузилиши натижасида содир этилган. Мазкур ҳолат юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши)билан жиноят иши қўзғатилган.
Ушбу моддага кўра, айбдор шахс муайян ҳуқуқдан маҳрум қилиб, 7 йилгача озодликдан маҳрум қилиш билан жазоланиши мумкин.
Айни пайтда гумон қилинувчи қонунга мувофиқ тартибда ушланган. Жиноят иши бўйича дастлабки тергов ҳаракатлари олиб борилмоқда.
