Хитой авиакомпаниялари Японияга парвозларни оммавий равишда бекор қилмоқда. Бу ҳақда Newsweek хабар берди.
Сўнгги кунларда икки давлат ўртасидаги муносабатлар кескинлашди. Бунга Япония бош вазири Санаэ Такаитининг Тайван масаласига оид баёноти сабаб бўлди. У Хитой ва Тайван ўртасида тўқнашув юз берган тақдирда Япония ҳарбий аралашуви эҳтимолини инкор этмади.
Маълумотларга кўра, авиакомпаниялар “йўловчилар сонининг кескин камайгани” сабаб Японияга 12 та йўналиш бўйича барча рейсларни бекор қилган. 31 декабргача бекор қилинган парвозлар сони ўтган ойга нисбатан қарийб 56 фоизга ошган.
Хитой Японияга нисбатан иқтисодий босимни ҳам кучайтирмоқда. Хусусан, 14 ноябрь куни расмийлар фуқароларни Японияга сафар қилмасликка чақирди. 19 ноябрда эса Япониядан денгиз маҳсулотлари импорти тўхтатилгани маълум қилинди.
Маълумот ўрнида, Япония бош вазирининг юқоридаги баёнотини Хитой кескин қоралаганди. Тайванни узоқ вақтдан бери ўз ҳудуди деб ҳисоблаб келаётган Хитой бу баёнотларга кескин муносабат билдирди. Жумладан, агар Япония вазиятга аралашса, ҳарбий чоралар кўриш билан таҳдид қилди.
