Бешта давлат ўз ҳарбийларини Ғазо секторидаги Халқаро барқарорлик кучларида иштирок этишга жалб қилди. Бу ҳақда ушбу тузилма қўмондони генерал-маёр Жаспер Жефферсга таяниб, Reuters хабар берди.
“Бугун биринчи бешта давлат — Индонезия, Марокаш, Қозоғистон, Косово ва Альбания Халқаро барқарорлик кучларида хизмат ўташ учун ўз қўшинларини жалб қилганини эълон қилишдан ниҳоятда мамнунман. Миср ва Иордания полицияни ўқитиш мажбуриятини олди”, деди Жефферс Тинчлик кенгашининг биринчи йиғилишида сўзлаган нутқида.
Маълум қилинишича, халқаро кучлар Ғазо жанубидаги Рафаҳ шаҳрига жойлаштирилади, у ерда полициячиларни ўқитади. Жефферс ҳар бир давлат қанча ҳарбий жўнатишига аниқлик киритмаган. Аммо Ғазо секторида Халқаро барқарорлаштириш кучларининг жами 20 минг аскари бўлади ва 12 минг полициячи ўқитилади.
АҚШда 19 февраль куни президент Дональд Трамп ташаббуси билан ташкил этилган Тинчлик кенгашининг биринчи йиғилиши бўлиб ўтди. Унда 20 дан ортиқ мамлакат, жумладан, Ўзбекистон делегациялари иштирок этди. Трамп Ўзбекистон, Қозоғистон, Озарбайжон, Марокаш, Баҳрайн, Қатар, Саудия Арабистони, Кувайт ва БАА Ғазони тиклаш учун 7 миллиард доллар ажратганини, АҚШ эса Тинчлик кенгаши лойиҳаларига 10 миллиард хайрия қилишини маълум қилди.
Дастлаб Тинчлик кенгаши ўт очишни тўхтатгандан кейин Ғазо секторини бошқариш учун халқаро орган сифатида кўриб чиқилган. Бироқ, Bloomberg маълумотларига кўра, кенгаш “можаролардан азият чекаётган ҳудудларда мустаҳкам тинчликни таъминламоқчи”. Баъзилар шу йўл билан Трамп Бирлашган Миллатлар Ташкилотига муқобил ташкилот яратишга ҳаракат қилаётганини таъкидлади.
