FIA Бош Ассамблеяси ва FIA мукофотлар маросими 9–12 декабрь кунлари Тошкентда ўтказилади. Тадбирларда 100 нафардан ортиқ профессионал пойгачи иштирок этади
Марказий Осиё тарихида илк бор «FIA General Assembly» ва «FIA Awards» маросими Тошкентда ўтказилади. Бу ҳақда Тошкент шаҳри ҳокимлиги матбуот хизмати хабар берди.
Тошкентдаги тадбирлар доирасида илк бор «FIA Gala» — автоспорт дунёсидаги энг нуфузли мукофотлар маросими бўлиб ўтади. Бу маросимда турли автомотоспорт чемпионатлари ғолиблари тантанали тарзда тақдирланади.
Тадбирда жаҳон автоспортининг энг нуфузли ташкилоти — FIA раҳбарияти, 149 та мамлакатдан 500 нафардан ортиқ юқори мартабали делегатлар ва миллий федерациялар вакиллари, шунингдек, 100 нафардан ортиқ профессионал пойгачилар иштирок этишади.
Маълумот учун: FIA (Fédération Internationale de l’Automobile) — Халқаро автомобиль федерацияси, 1904 йилда ташкил топган. Автоспорт ва автомобилизм соҳасидаги энг йирик халқаро ташкилот бўлиб, у Formula 1, World Rally Championship (WRC), World Endurance Championship (WEC) каби чемпионатларни бошқаради. FIA General Assembly — автоспорт бўйича Халқаро автомобиль федерациясининг йиллик йиғилиши.
