Ўзбекистон миллий терма жамоаси 8 июнь куни Нью Йоркда Нидерландия терма жамоасига қарши ўртоқлик учрашуви ўтказади. Ушбу баҳс арафасида тарқалган миш-мишлар юзасидан Ўзбекистон футбол ассоциацияси (ЎФА) расмий баёнот берди.
Ассоциация хабарига кўра, Нидерландия терма жамоасига қарши ўйин учун 300 минг доллар тўланаётгани ҳақидаги хабарлар асоссиз. Ташкилот мазкур беллашув учун ҳеч қандай маблағ тўламаслигини, стадион ижараси, хавфсизлик ва трансляция харажатлари эса томонлар ўртасидаги келишувга кўра тенг тақсимланишини маълум қилди.
Эслатиб ўтамиз, аввалроқ ЎФАнинг терма жамоалар бўлими собиқ раҳбари Шерзод Эгамбердиев ўзининг Instagram саҳифасида федерация ушбу назорат баҳси учун 300 минг АҚШ доллари миқдорида маблағ сарфлангани ҳақида хабар тарқатган эди.
Маълумот учун, Фабио Каннаваро бошчилигидаги Ўзбекистон терма жамоаси 26 май куни Жаҳон чемпионатида иштирок этиш учун жўнаб кетади. “Оқ бўрилар” Тошкент – Нью-Йорк йўналиши бўйича парвоз қилиб, 1 июнь куни Канадага (Эдмонтон), 8 июнь куни эса Нидерландияга (Нью-Йорк ) қарши ўртоқлик ўйинларида майдонга тушади.
