АҚШнинг Нью Жерси штати Спортчилар назорат кенгаши Ньюарк шаҳрида бўлиб ўтган UFC 328 турниридан кейинги тиббий четлатишларнинг тўлиқ рўйхатини эълон қилди.
Ушбу турнирининг марказий жангида Шон Стрикленд ўрта вазн тоифаси чемпионлик камари учун кечган баҳсда Ҳамзат Чимаевни ҳакамларнинг бўлинган қарори билан мағлуб этган эди.
Яқинда елкасидаги бир қатор жароҳатларни очиқлаган Стрикленд, эндиликда чап қўлини ортопед кўригидан ўтказиб, рухсат олгунга қадар номаълум муддатга жанглардан четлатилди. Унга энг камида 45 кунлик четлатиш ва 30 кунлик машғулотларсиз режим белгиланди. Чимаев эса турнирдан “бутун” чиқди, бироқ у ҳам 45 кунлик четлатиш ва 30 кун машғулотларда қатнашмаслиги зарур.
Шу билан бирга, турнинг иккинчи марказий жангида ўта енгил вазн тоифасида чемпионлик учун октагонга кўтарилган Жошуа Ван ва Татсуро Таира ҳам номаълум муддатга жангсиз қоладиган бўлди (ушбу баҳсда Ван 5-раундда техник нокаут эвазига ғалаба қозонган эди). Ван сафга қайтиши учун чап қўли бўйича шифокор рухсати керак, Таирага эса бош қисмини компьютер томографияси қилиш талаб этилади. Шунингдек, Таира нокаутга учрагани сабабли мажбурий равишда 90 кунгача жангларда ва 60 кунгача машғулотларда иштирок этмаслиги белгиланди.
