АҚШ ва Исроилнинг Эронга қарши уруши ҳамда Ҳормуз бўғозининг ёпилиши фонида нефть нархи 2022 йилдан бери илк бор 100 доллардан ошди. Душанба, 9 март куни савдолар бошида Европада эталон ҳисобланган Brent маркали нефть фьючерслари қарийб 20 фоизга ошиб, бир баррел (159 литр) учун 111,04 долларгача кўтарилди. Бу ҳақда Deutsche Welle хабар берди.
Американинг Wеst Техаs Intermediate (WTI) маркали нефти фьючерслари эса 16,8 фоизга ошиб, 106,17 долларни ташкил этди. Савдо жараёнида нарх бир муддат 111,24 долларгача ҳам кўтарилган.
6 март, жума куни эса май ойида етказиб бериладиган Brent нефтьи 2024 йил апрелидан бери илк бор 90 доллардан юқори нархда савдога қўйилди. Ҳолбуки, 28 февралда Эронга қарши ҳарбий операция бошланишидан олдин нефть нархи бир баррел учун тахминан 70 доллар атрофида эди.
Ҳормуз бўғозининг узоқ муддат ёпилиб қолиши ҳақидаги хавотирлар
Нефть бозоридаги энг муҳим омиллардан бири — Ҳормуз бўғози узоқ муддатга ёпилиб қолиши мумкинлиги ҳақидаги хавотирлардир. Тинч даврда ушбу бўғоз орқали ҳар куни дунё нефтьининг қарийб 20 фоизи ташилади. Шунингдек, у Қатардан суюлтирилган табиий газ (СТГ) экспорти учун ҳам катта аҳамиятга эга.
Жаҳон нефть бозоридаги кескин вазият фонида АҚШ молия вазири Сcотт Бессент 6 март куни Вашингтон танкерлар бортида аллақачон юкланган Россия нефтьига қўйилган санкцияларни юмшатиш имкониятини кўриб чиқаётганини маълум қилди.
Ўша куни АҚШ Ҳиндистон нефтьни қайта ишлаш заводларини танкерга юклаб бўлинган Россия нефтьини сотиб олиш тақиқидан 30 кун муддатга озод қилди.
Эрон нефть инфратузилмасига авиазарба
7 март куни Исроил илк бор Эроннинг нефть инфратузилмасига авиазарба берди. Теҳрон ва унинг атрофидаги бешта энергетика объекти ҳужумга учради. Бунга жавобан Ислом инқилоби қўриқчилари корпуси Форс кўрфази мамлакатларидаги нефть объектларига ҳужум қилиш билан таҳдид қилди.
“Агар сиз бир баррел нефть нархи 200 доллардан ошишига тайёр бўлсангиз, ўйинни давом эттиринг”, деб корпус вакилининг сўзларини келтирган The Guardian газетаси.
