Мамлакат уламоларидан иборат Экспертлар кенгаши бу лавозимга АҚШ ва Исроилнинг ҳаво ҳужумларида ҳалок бўлган Али Хоманаийнинг иккинчи ўғли Можтабо Хоманаийни муносиб кўрди. Бу ҳақда The Guardian газетаси хабар берди.
Можтабо Хоманаий шу кунга қадар бирор расмий давлат лавозимини эгалламаган бўлса-да, мамлакатнинг энг нуфузли шахсларидан бири ҳисобланади.
Бу тайинловни Эрон томонидан қўллаб-қувватланадиган Яман ҳусийлари ҳам олқишлади.
“Эрон Ислом Республикаси раҳбарияти ва халқини муҳим ҳамда бурилиш нуқтасидаги ушбу пайтда Саййид Можтабо Хоманаийни Ислом инқилоби олий раҳбари этиб сайлангани билан табриклаймиз”, дейилади гуруҳнинг Telegram’даги баёнотида.
Улар бу қарорни “Ислом инқилоби учун янги ғалаба ва Эрон Ислом Республикаси ҳамда халқининг душманларига кучли зарба” деб атади.
Газетанинг ёзишича, ушбу танлов урушни янада кескинлашишига олиб келиши мумкин. Чунки Дональд Трамп Можтабо Хоманаийни эҳтимолий ворис сифатида олдиндан тилга олиб, бундай натижани “қабул қилиб бўлмайдиган” деб айтган эди.
Можтабо Хоманаийнинг олий раҳбарликка кўтарилиши 1979-йилги Ислом инқилобидан бери илк бор Эрон олий раҳбарлиги отадан ўғилга ўтганини англатади. 37 йил ҳукмронлик қилган Оятуллоҳ Али Хоманаий 28 февраль куни АҚШ ва Исроил томонидан берилган авиазарбалар оқибатида ҳалок бўлган эди.
Мамлакат ОАВ Эрон қуролли кучлари раҳбарияти янги олий раҳбарга содиқлик билдиришини маълум қилди. Парламент спикери эса бу қарорни олқишлаб, Можтабо Хоманаийга эргашишни “диний ва миллий бурч” деб атади.
Эрон хавфсизлик хизмати раҳбари янги раҳбар мамлакатни ҳозирги нозик даврдан олиб ўта олишини таъкидлади. Инқилобий гвардия эса унга бўйсунишга тайёр эканини билдириб, асосий давлат институтларининг кенг қўллаб-қувватлашини намоён қилди.
АҚШ президенти Дональд Трамп эса якшанба куни Эроннинг навбатдаги олий раҳбари Теҳрон аввал унинг розилигини олмаса, “узоқ вақт туриб бера олмайди”, дея баёнот берган. Шунингдек, у Можтабо Хоманаийни “қабул қилиб бўлмайдиган танлов” деб атаган. Трамп Эрон раҳбари сифатида Али Хоманаийнинг ўғлини келиш эҳтимолини рад этиб, Вашингтон Эроннинг келажак сиёсий йўналишида ўз сўзига эга бўлиши кераклигини таъкидлаган.
Шу куни Исроил ҳарбийлари X (собиқ Twitter) ижтимоий тармоғида форс тилида ёзган хабарида, Али Хоманаийнинг ҳар қандай ворисини таъқиб қилишда давом этишини ва уни тайинлашга уринаётган ҳар бир шахсни ҳам нишонга олишини билдирди.
Кўплаб таҳлилчиларга кўра, Можтабо Хоманаийнинг тайинланиши режим ҳали ҳам кучли эканини ва Ғарб босимига бўйсунмаслигини кўрсатишга қаратилган рамзий қадамдир.
