Буюк Британия Суриянинг амалдаги президенти Аҳмад аш-Шар`а ва мамлакат ички ишлар вазири Анас Хаттобга нисбатан санкцияларни бекор қилди. Бу ҳақда Британия Молия вазирлигининг 7 ноябрь, жума куни эълон қилинган ҳужжатида маълум қилинди.
Уларнинг иккаласи ҳам илгари “Ислом давлати” ва “Ал-Қоида”га қарши жорий этилган молиявий чекловлар таъсирида бўлган. Октябрь ойида Буюк Британия 2024 йил декабрида Сурияда ҳокимиятни қўлга олган “Ҳайъат Таҳрир аш-Шом” ( ҲЕШ ) гуруҳини террористик ташкилотлар рўйхатидан чиқарди.
Reuters агентлигининг хабар беришича, Европа Иттифоқи ҳам аш-Шарага нисбатан чекловларни бекор қилишга тайёрланмоқда.
“Биз барча сурияликлар учун яхшироқ келажак қуришга кўмаклашиш мақсадида сурияликлар раҳбарлигида ва бевосита иштирокида амалга ошириладиган тинч ва инклюзив ўтишни қўллаб-қувватлашни давом эттирамиз”, — деди Еврокомиссия вакили.
Аш-Шар`а ва Трамп учрашувидан олдин санксиялар бекор қилинди
БМТ Хавфсизлик кенгаши 6 ноябрь куни Сурия раҳбаридан ўтиш даври учун, шунингдек, Сурия ИИВнинг амалдаги раҳбаридан санкцияларни олиб ташлашни назарда тутувчи қарорни қабул қилди. АҚШ томонидан тайёрланган ҳужжат учун Хавфсизлик кенгашининг 15 аъзосидан 14 нафари, жумладан Россия ҳам овоз берди. Хитой бетараф қолди. Қарор матнида “Сурия Араб Республикасининг суверенитети, мустақиллиги, ҳудудий яхлитлиги ва миллий бирлигини тўлиқ ҳурмат қилишга содиқлик” таъкидланган.
