Сенатнинг ўн биринчи ялпи мажлисида Қашқадарё вилоятидан сайланган сенатор Комила Карамова сунъий интеллектдан тинимсиз ва манқуртларча фойдаланиш онгни заифлаштираётганини айтди.
“Ушбу замонавий технологиянинг қулайлиги, афзаллик томонлари жуда кўп. Лекин салбий жиҳати ҳам кўзга ташланиб қоляпти. Масалан, ёшлар, талабалар, ўқувчилар учун у тайёр дастёрга айланиб, курс иши, назорат ишини сунъий интеллект тайёрлаб беряпти. Ҳамма саволларга ҳам тўғри жавоб беряпти деб айтолмаймиз”, деди сенатор.
Унинг қайд этишича, сунъий интеллектнинг ёлғон маълумот бериш фоизлари ошиб боряпти.
More stories“Ўқувчилар масалалар ечимида ўйламай, чат-ботнинг жавобини, яъни кўп ҳолларда нотўғри жавобини олишяпти. Натижа нима бўляпти? Оқибатда сунъий интеллектдан тинимсиз ва манқуртларча фойдаланиш онгни заифлаштирмоқда”, деди Комила Карамова.
1 ноябрь куни бўлиб ўтган ушбу ялпи мажлисда “Сунъий интеллектни қўллаш орқали юзага келадиган муносабатлар тартибга солиниши муносабати билан Ўзбекистоннинг айрим қонун ҳужжатларига қўшимча ва ўзгартиришлар киритиш тўғрисида”ги қонун кўриб чиқилиб, маъқулланди. Қонун билан тегишли қонун ҳужжатларига, жумладан “Ахборотлаштириш тўғрисида”ги қонунга сунъий интеллектни қўллаш орқали юзага келадиган муносабатларни тартибга солувчи ўзгартириш ва қўшимчалар киритилмоқда.
Хусусан, “сунъий интеллект” тушунчасига ҳуқуқий таъриф берилмоқда, ушбу соҳадаги давлат сиёсатининг асосий йўналишлари ҳамда махсус ваколатли органнинг вазифалари белгиланмоқда, ахборот ресурсларини яратишда ҳамда ахборот тизимлари ишида сунъий интеллектдан фойдаланишнинг умумий қоидалари ҳамда ушбу технологиялардан фойдаланишда шахсга доир маълумотлар дахлсизлигини таъминлашга қаратилган қоидалар белгиланмоқда.
Сунъий интеллект технологияларидан фойдаланган ҳолда шахсга доир маълумотларга қонунга хилоф равишда ишлов бериш ва уни ОАВ ҳамда интернетда тарқатганлик учун маъмурий жавобгарлик белгиланяпти.
Олий Мажлис Қонунчилик палатасининг 12 августдаги мажлисида сунъий интеллектни қўллаш орқали юзага келадиган муносабатларни тартибга солишга қаратилган ушбу қонун лойиҳаси учинчи ўқишда қабул қилинганди. 15 апрелда ўтказилган мажлисда депутатлар қонун лойиҳасининг мазмун-моҳияти ва аҳамиятига алоҳида тўхталиб, уни янада такомиллаштириш, пишиқ-пухта ҳолатга келтириш бўйича ўз фикр-мулоҳазаларини, таклифларини билдирганди.
Сенаторларнинг фикрича, ушбу қонун сунъий интеллект технологияларини янада ривожлантиришга, ундан фойдаланишнинг умумий асосларини белгилашга ҳамда мазкур соҳада юзага келадиган муносабатларда фуқароларнинг ҳуқуқ ва эркинликларини янада ишончли ҳимоя қилишга хизмат қилади.
