Афғонистондан контрабанда қилиниб, Бухоро шаҳри ҳудудига яшириб кетилган гиёҳвандлик воситасини олган икки киши қамоққа олинди. Бу ҳақда Давлат хавфсизлик хизмати хабар берди.
Бухоро – Қоракўл йўналишида ҳаракатланаётган Gentra Жондор тумани ҳудудида тўхтатилиб, текширилганда Қоракўл туманида яшовчи, 1969-йилда туғилган шахс ва 1973-йилда туғилган хорижий давлат фуқароси кетаётган автомашина салонида соф вазни 4 килограмм 715 грамм бўлган опий моддаси борлиги аниқланиб, процессуал тартибда расмийлаштириб олинган.
Маълум бўлишича, улар ушбу гиёҳвандлик воситасини муқаддам наркокурьерлар томонидан Афғонистондан контрабанда қилиниб, Бухоро шаҳри ҳудудига яшириб кетилган хуфия жойдан олган.
Ҳозирда мазкур фуқароларга нисбатан Жиноят кодексининг 28,246-моддаси 2-қисми (контрабанда) ва 25,273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш) билан жиноят иши қўзғатилиб, қамоқ эҳтиёт чораси қўлланди.
Қонунчиликка мувофиқ, бундай жиноятлар содир этган шахслар 10 йилдан 20 йилгача озодликдан маҳрум қилиниши мумкин.
