Бухоро вилояти Вобкент туманида икки нафар қизга Telegram орқали шилқимлик қилиб, уларга порнографик суратлар юборган йигит жавобгарликка тортилди.
Маълум бўлишича, 2008-йилда туғилган Ш.Т. 14 май куни Н. ва Ҳ. исмли қизларга Telegram орқали қўнғироқ қилиб, шаҳвоний мазмунда гапириб, шилқимлик қилган. Бундан ташқари, уларга турли порнографик материаллар ҳамда ўзининг интим суратларини юборган.
Судда ҳуқуқбузар айбига тўлиқ иқрор бўлиб, қилмишидан пушаймонлигини билдирган ва жабрланувчилардан кечирим сўраган.
Жиноят ишлари бўйича Вобкент туман суди Ш.Т.ни Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисми ва 189-моддасида (порнографик маҳсулотни тайёрлаш, олиб кириш, тарқатиш, реклама қилиш, намойиш этиш) назарда тутилган ҳуқуқбузарликларни содир этган деб топган. Унга нисбатан 3 сутка маъмурий қамоқ ҳамда базавий ҳисоблаш миқдорининг 50 баравари, яъни 20 миллион 600 минг сўм миқдорида жарима жазоси тайинланган. Шунингдек, ҳуқуқбузарлик содир этишда фойдаланилган Samsung А5 телефони давлат фойдасига мусодара қилинган.
