Америкалик афсонавий боксчи Жорж Форманнинг 1968-йилги Мехико Олимпиадасида қўлга киритган олтин медали “Lelands” аукцион уйида савдога қўйилди. Бу ҳақида ташкилот расмий саҳифасида хабар берилди.
Форман ўша мусобақада 19 ёшида эди ва +81 кг вазн тоифасида чемпионликни қўлга киритган эди. У финалда совет боксчиси Йонас Чепулисни техник нокаут билан мағлуб этиб, олтин медални ўзиники қилган. Спорт ёдгорликлари савдоси билан танилган, 1985-йилдан бери фаолият юритаётган “Lelands” мазкур медални аукционда сотилаётганини эълон қилди. Унинг бошланғич нархи 2 500 доллар этиб белгиланганди, ҳозирги таклиф эса 6 486 доллардан ошган.
Маълумот учун, Жорж Форман Олимпия чемпиони, шунингдек, WBC, WBA ва IBF камарларини эгаллаган оғир вазн тоифаси собиқ чемпиони ҳисобланади. У профессионал рингда 81 та жанг ўтказиб, 76 тасида ғалаба қозонган бўлиб, ушбу беллашувларнинг 68 таси нокаут билан якунланган.
Боксчи 1969-йилда профессионал рингга ўтиб, 1977-йилда фаолиятини якунлаган. Аммо орадан 10 йил ўтиб, Форман яна рингга қайтади. У 1997 йил, 48 ёшида спортчилик карьерасини якунлаган.
