Жорий йилнинг 6 март куни Тошкент метрополитенининг “Пахтакор” ва “Новза” бекатлари оралиғида, электропоезд вагони ичида бегона аёлнинг белидан паст қисмига тегинган эркак қамалди.
Иш материалларига кўра, воқеа 6 март куни пойтахтдаги метро вагонида, “Пахтакор” ва “Новза” бекатлари оралиғида содир бўлган. Наманган вилоятидан бўлган 27 ёшли фуқаро бир неча бор аёлнинг танасига тегиб, унга шаҳвоний шилқимлик қилган.
Судланувчининг ўзи айбини қисман тан олган ва жисмоний алоқа тасодифий бўлганини ва метро вагонида одамларнинг кўплигидан келиб чиққанини айтган. Шунингдек, у ўз қилмишларидан пушаймон эканлигини билдирган.
Чилонзор тумани жиноят ишлари бўйича суди эркакни Маъмурий жавобгарлик тўғрисидаги кодексининг 41-1-моддаси (шаҳвоний шилқимлик қилиш) бўйича айбдор деб топган ва унга беш кунлик маъмурий қамоқ жазосини тайинлаган.
