Исроил Кнессети (парламент) террорчилик жиноятлари учун ўлим жазосини жорий этишни назарда тутувчи қонунни қабул қилган. Ҳужжатни 62 нафар депутат қўллаб-қувватлаган, 48 нафари қарши овоз берган, яна бири бетараф қолган. Бу ҳақда “ The Jerusalem Post” хабар берди.
Қонунга кўра, агар шахс террорчилик ҳаракати давомида атайлаб одам ўлдирса, унга ўлим жазоси қўлланади. Ҳукм чиқарилгандан сўнг, жазони 90 кун ичида осиш орқали ижро этиш режалаштирилган.
Ушбу қонунни жорий этиш ташаббуси ультраўнг сиёсий куч – “Яҳудий кучи” депутатлари томонидан илгари сурилган. Бу партияга Исроил миллий хавфсизлик вазири Итамар Бен-Гвир раҳбарлик қилади.
Қонун қабул қилингач, депутатлар бу воқеани нишонлаб шампан ичган. Бен-Гвир ўзининг Telegram-каналида видео жойлаб, унда у ҳамкорлари билан бирга қадаҳ кўтарган.
“Reuters” маълумотига кўра, ушбу қонун асосан фаластинликларга таъсир қилади. Чунки уларга нисбатан ҳарбий судлар террорчилик ишлари бўйича кўпинча сиртдан ҳукм чиқарган.
Исроилда қотиллик учун ўлим жазоси 1954 йилда бекор қилинган эди.
Ғарбий Соҳилдаги ҳарбий судлар фаластинликларга ўлим жазоси чиқариш ҳуқуқига эга бўлсада, амалда бу жазони ҳеч қачон қўлламаган.
Маҳмуд Аббос ушбу қонунни қоралаб, уни фаластинликларни қўрқитишга қаратилган “муваффақиятсизликка маҳкум уриниш” деб атаган.
Шунингдек, Исроилнинг етакчи инсон ҳуқуқлари ташкилотлари бу қонунни “институционаллаштирилган дискриминация ва фаластинликларга нисбатан ирқчилик зўравонлиги” деб баҳолаган.
