Ўзбекистонда нақд пулсиз ҳисоб-китобларни кенгайтириш ва яширин иқтисодиёт улушини қисқартиришга қаратилган янги тартиб жорий этилади. Президентнинг 2025 йил 10 декабрда қабул қилинган фармонига кўра, 2026 йил 1 апрелдан бошлаб бир қатор йўналишларда тўловлар фақат банк карталари ёки электрон тўлов тизимлари орқали амалга оширилади.
Янги тартибга мувофиқ, қуйидагиларни нақд пулга сотиш ёки харид қилиш тақиқланади:
- давлат органлари томонидан кўрсатиладиган хизматлар;
- электр энергияси, табиий газ ва ичимлик суви учун тўловлар;
- алкоголь ва тамаки маҳсулотлари;
- автомобильларга ёқилғи қуйиш шохобчаларида нефть-газ маҳсулотлари ҳамда электр транспорт воситаларини қувватлантириш хизматлари;
- қиймати 25 миллион сўмдан юқори бўлган барча турдаги товар ва хизматлар;
- кўчмас мулк объектлари, ишлаб чиқарилганига 10 йилдан ошмаган М, Н, О ва Г тоифасига кирувчи транспорт воситалари ҳамда махсус автотранспорт воситаларининг олди-сотдиси.
Фармонга кўра, ушбу чора-тадбирлар 2030-йилга қадар кузатиб бўлмайдиган иқтисодиёт улушини ялпи ички маҳсулотга нисбатан 1,3 бараварга қисқартириш ҳамда аҳолининг савдо ва хизматлар учун нақдсиз тўлов улушини 75 фоизга етказишга хизмат қилади.
