Америка гиганти Ford ва Франциянинг Renault компаниялари кучайиб бораётган Хитой электромобиллари рақобатига қарши курашиш учун йирик ҳамкорликни эълон қилди. Бу ҳақда CNN хабар берди.
Телеканалга кўра, компаниялар Европа бозори учун арзон, ўта рақобатбардош янги авлод электр автомобилларини биргаликда ишлаб чиқариш учун бирлашмоқда. Ford бош директори Жим Фарли Хитойга қарши ушбу бирлашувни “ҳаёт учун кураш” деб атаган. Айниқса, Европада Хитойнинг BYD, Xpeng каби брендларининг “таҳдиди” кучли эканини таъкидлаган. Ҳамкорлик доирасида ишлаб чиқариладиган икки кичик, арзон Ford брендли электромашинанинг биринчи модели 2028 йилда Европа бозорига кириб боради. У Renault’нинг Франциядаги заводида ишлаб чиқарилади.
Renault раҳбари Франсуа Провост эса Хитой компаниялари жуда тез бозорни эгаллаётганини инобатга олиб, кутишни истамаслигини маълум қилган. Расмийлар бу шунчаки ҳамкорлик эканини ва икки компания қўшилишни режалаштирмаётганини тасдиқлаган. Ford бу ҳаракат билан Европада йўқотган бозор улушини (2019 йилдаги 6,1 фоиздан 3,3 фоизга тушган) тиклашни мақсад қилган. Renault эса бу орқали ишлаб чиқариш кўламини ошириб, харажатларни камайтириш ниятида.
