Жиззах вилоятида 2 миллиард сўмдан ортиқ криптоактив айланмасини ноқонуний амалга оширган шахсга нисбатан жиноят иши қўзғатилди. Бу ҳақда вилоят Ички ишлар бошқармаси хабар берди.
Қайд этилишича, ИИБ Ахборот технологиялари соҳасидаги жиноятларга қарши кураш бошқармаси киберхавфсизлик бўлими ходимлари томонидан олиб борилган тадбирлар давомида Шароф Рашидов туманида яшовчи 1995 йилда туғилган фуқаронинг ноқонуний крипто фаолият билан шуғуллангани аниқланган.
Маълум бўлишича, у iPhone 12 мобил қурилмаси орқали Bitget крипто биржасининг мобил иловасидан фойдаланган ҳолда электрон ҳамён ташкил этган ва 2025–2026 йиллар давомида 2 миллиард 50 миллион сўмдан ортиқ маблағга тенг криптоактивлар айланмасини амалга оширган.
Мазкур ҳолат юзасидан Жиноят кодексининг 278⁸-моддаси (Крипто-активлар айланмаси соҳасидаги қонунчиликни бузиш) 3-қисми “а” банди билан жиноят иши қўзғатилиб, ҳозирда тергов ҳаракатлари олиб борилмоқда.
Мутасаддилар криптоактивлар билан боғлиқ фаолият қатъий ҳуқуқий тартибга солинганини, бундай операциялар фақат расмий ва лицензияланган платформалар орқали амалга оширилиши лозимлигини таъкидлади.
