Тошкент вилоятидаги “Навоий” чегара божхона постидан 338 грамм қуйма олтинни яширинча олиб ўтишга уринган шахс тўхтатиб қолинди. Бу ҳақда Тошкент вилояти божхона бошқармаси хабар берди.
Маълум қилинишча, мазкур шахс божхона постига пиёда кириб келган. Ходимлар томонидан йўловчининг ҳаракатларида шубҳа уйғотувчи ҳолатлар кузатилган. Шундан сўнг фуқаро “Body scanner” қурилмаси орқали божхона назоратидан ўтказилган.
Натижада фуқаронинг оёқ кийимлари остига яширилган, оғзаки сўровда маълум қилинмаган ҳамда йўловчи божхона декларациясида қайд этилмаган умумий оғирлиги 338 грамм бўлган қуйма олтин парчалари борлиги аниқланган.
Ҳозирда мазкур ҳолат юзасидан божхона органлари томонидан суриштирув ҳаракатлари олиб борилмоқда.
