АҚШ президенти Дональд Трамп федерал идораларга ўзга сайёраликлар, номаълум учар жисмлар ва ҳодисалар билан боғлиқ ҳукумат файлларини ошкор қилишни буюрди. Бу ҳақда Reuters хабар берди.
Трамп бу масалага жамоатчиликнинг қизиқиши юқори эканини таъкидлади. Шу сабабли 20 февраль куни Пентагон раҳбари Пит Ҳегсет ва бошқа идораларга бу маълумотларни эълон қилишни буюрди.
Бундан олдин эса Трамп собиқ президент Барак Обамани ўзга сайёраликлар ҳақида омма олдида гапириб, махфий маълумотларни очиқлаганликда айблади. У бунга ҳеч қандай далил келтирмади ва Обама “катта хато қилгани”ни айтди.
“У буни махфий маълумотлар орасидан олди… бундай қилмаслиги керак эди”, деди Трамп.
АҚШ собиқ президенти Барак Обама 14 февраль куни подкастда ўзга сайёраликлар мавжудлиги эҳтимолига муносабат билдирган эди.
“Улар бор, лекин мен уларни кўрмаганман ва улар… “51-ҳудуд”да сақланмаяпти”, деган Обама.
“51-ҳудуд” Невада штатидаги Ҳарбий ҳаво кучларининг махфий объекти бўлиб, фитна назариячилари у ерда ўзга сайёраликлар жасади ва ҳалокатга учраган космик кема сақланади, деб тахмин қилиб келади. Марказий разведка бошқармасининг 2013-йилда эълон қилинган архив ҳужжатларида бу ер ўта махфий жосуслик самолётлари учун синов майдони бўлгани айтилган.
Обама ўз баёнотларида махфий маълумотларни ошкор қилганига ҳеч қандай далил йўқ.
“Президентлигим давомида ўзга сайёраликларнинг биз билан алоқа ўрнатганига оид бирон бир далил кўрмадим. Ҳақиқатан ҳам!” деди Обама подкастдан бир кун ўтиб Instagram’га жойлаган постида.
Унда Обама коинотнинг бепоёнлиги сабабли Ердан ташқарида ҳаёт мавжуд бўлишининг статистик эҳтимоли юқори эканини айтди. Шу тариқа ўзга сайёраликлар борлигига ишонишини изоҳлади. У масофанинг олислигини ҳисобга олиб, ўзга сайёраликларнинг Ерга ташриф буюриш эҳтимоли паст деб баҳолади.
Обамани танқид қилган Трамп ҳам ўзга сайёраликлар мавжудлигига оид далил кўрмаганини айтиб, “Улар бор-йўқлигини билмайман”, дея таъкидлади.
Сўнгги йилларда Пентагон номаълум учар жисмлар ҳақидаги хабарларни ўрганиб чиқди. 2022-йилда юқори мартабали ҳарбий раҳбарлар ўзга сайёраликларнинг Ерга ташриф буюргани ёки шу ерда ҳалокатга учраганига оид ҳеч қандай далил топмаганини эълон қилди.
Пентагоннинг 2024-йилги ҳисоботида ҳам Иккинчи жаҳон урушидан бери ўтказилган текширувларда ўзга сайёраликлар технологиясига оид ҳеч қандай далил топилмагани, кузатилган ҳолатларнинг аксарияти оддий объектлар ва табиий ҳодисалар экани қайд этилган.
