Эфиопиянинг Амхара минтақасида йўловчи автобусининг жарликка қулаб тушиши оқибатида камида 28 киши ҳалок бўлди. Бу ҳақда полиция маълумотларига таяниб, Амхара давлат медиа корпорацияси хабар берди.
Маълум қилинишича, автобус Десси шаҳридан пойтахт Аддис-Абебага йўл олган пайтда йўл-транспорт ҳодисаси содир бўлган. Дастлабки маълумотларга кўра, маҳаллий йўналишда ҳаракатланаётган автобус ҳайдовчи бошқарувни йўқотганидан сўнг йўлдан чиқиб кетиб, дарёга қулаган.
“Ҳозирга қадар 28 киши ҳаётдан кўз юмди, кўплаб одамлар турли даражадаги жароҳатлар олди”, дейилган полиция маълумотида.
Қайд этилишича, жароҳатланганлар орасида аҳволи оғир бўлганлар ҳам бор. Ҳодиса жойида қутқарув ва тергов ишлари давом этмоқда.
Маълумот ўрнида, Эфиопияда йўл-транспорт ҳодисалари тез-тез учраб туради. Мутахассислар бу ҳолатга ҳайдовчилик маданиятининг пастлиги ва кўплаб транспорт воситаларининг техник ҳолати талаб даражасида эмаслигини сабаб қилиб кўрсатади.
