Лондон шаҳрида Uber компанияси Британиянинг Wayve компанияси томонидан ишлаб чиқилган сунъий интеллект технологияси асосида автоном такси хизматини ишга туширди.
Дастлаб хизмат доирасида 20 тадан кам Ford Mustang Mach-E электромобили йўлга чиқарилади. Автомобиллар махсус оператор томонидан кузатиб борилади. Кейинчалик тўлиқ ҳайдовчисиз ҳаракатланиш режалаштирилган.
UberX, Uber Comfort ёки Uber Electric хизматига буюртма берган йўловчилар қўшимча ҳақ тўламасдан Wayve технологияси билан жиҳозланган автоном автомобилдан фойдаланиши мумкин.
Wayve компанияси маълум қилишича, унинг AI Driver тизими инсон ҳайдовчиси каби тажриба асосида ўрганади ҳамда янги йўллар, транспорт воситалари, об-ҳаво шароитлари ва шаҳар муҳитига мослаша олади.
Компаниялар Лондонда тўлиқ ҳайдовчисиз хизматни йўлга қўйишдан олдин бир қатор тартибга солувчи масалалар ҳал қилиниши кераклигини таъкидлаган.
Wayve 2024 йилда Uber билан ҳамкорликни бошлаган. Лондон эса роботакси хизмати йўлга қўйилган Европадаги Загребдан кейинги иккинчи шаҳар бўлди.
