Бугун, 2 июнь куни Навоий шаҳридаги кўп қаватли уйнинг том қисмида ёнғин содир бўлди. Бу ҳақда вилоят Фавқулодда вазиятлар бошқармаси хабар берди.
Маълум қилинишича, 2 июнь куни соат 04:19 да Навоий шаҳар “Кимёгар” МФЙ, Алишер Навоий кўчасида жойлашган кўп қаватли уйнинг том қисми ёнаётгани ҳақида ФВБга хабар келиб тушган.
Ёнғин жойига 7 та қутқарув бўлинмаси ва 2 та автонарвон соат 04:23 да етиб бориб, ёнғин соат 04:35 да қуршаб олинган ҳамда соат 05:35 да тўлиқ ўчирилган.
Дастлабки маълумотларга кўра, 9 қаватли ушбу кўп қаватли уйнинг 9-қаватида жойлашган 8 та хонадоннинг 300 квадрат метр майдондаги том қисми, шифти ва ички қисми ёнган.
Ёнғин оқибатида тан жароҳати олган фуқаролар ҳақида мурожаатлар келиб тушмаган. Айни вақтда ёнғиннинг келиб чиқиш сабаблари ва етказилган зарар миқдори аниқланмоқда.
