БМТнинг Ливандаги муваққат тинчлик кучлари (UNIFIL) 14 ноябрь куни Исроил армияси Ливаннинг жанубида, БМТ белгилаган “Кўк чизиқ” яқинида бетон деворлар қурганини маълум қилди. Бу ҳақда Al Arabiya хабар берди.
UNIFIL Ливан армияси билан бирга ўтган ноябрда “Ҳизбуллоҳ” ва Исроил ўртасида тузилган сулҳни мустаҳкамлаш устида ишламоқда. Таъкидланишича, Исроил девор борасидаги айбловни инкор этмоқда. БМТ бу қурилишларни Ливан суверенитетининг бузилиши деб атади. Ташкилотнинг расмий баёнотида айтилишича, октябрь ойида Ярун қишлоғи яқинида Исроил мудофаа кучлари ўрнатган бетон девор ўрганилган.
“Девор Кўк чизиқдан ўтиб кетган, натижада 4 минг квадрат метрдан ортиқ Ливан ҳудудига аҳоли кира олмаяпти”, дейилади баёнотда.
Ноябрь ойида БМТ тинчлик кучлари яна қўшимча девор қурилаётганини кўрган ва унинг яна бир қисми Кўк чизиқдан ўтгани қайд этилган. AFP мазкур ҳолат юзасидан Исроил ҳарбийларига мурожаат қилганда, яҳудийлар қуйидагича жавоб берган:
“Бу девор 2022-йилда бошланган кенг кўламли ҳарбий режанинг бир қисмидир. Уруш бошланганидан бери шимолий чегара бўйлаб муҳофаза чоралари кучайтирилди. Девор Кўк чизиқдан ўтмаган”.
UNIFIL мазкур ҳолатни БМТ Хавфсизлик Кенгаши 1701-резолуциясининг бузилиши деб баҳоламоқда. Мазкур резолуция 2006-йилда Исроил–“Ҳизбуллоҳ” урушига чек қўйган ва 2024 йил ноябрь ойидаги сулҳнинг асосини ташкил этган эди. БМТ Исроилга деворларни кўчириш бўйича расмий сўров юборганини, ноябрь текшируви бўйича хулосалар ҳам тез орада тақдим этилишини билдирди.
Икки давлат ўртасидаги сулҳга кўра, Исроил қўшинлари Ливаннинг жанубидан чиқиши керак эди, аммо Тель-Авив стратегик деб ҳисоблайдиган 5 та нуқтада қўшинларини ушлаб турибди. Яҳудий давлати Ливанга мунтазам ҳужумлар амалга ошириб келмоқда ва уларни асосан “Ҳизбуллоҳ”га қарши операциялар деб изоҳлайди.
