Ўзбекистон Жаҳон савдо ташкилотига аъзолик йўлида Ҳиндистон билан музокараларни якунлаш тўғрисидаги протоколни расман имзолади. Ушбу музокараларнинг параметрлари 2024 йилда келишиб олинган эди. Бу ҳақда Ўзбекистон Президентининг ЖСТ масалалари бўйича махсус вакили Азизбек Ўрунов ўзининг LinkedIn саҳифасида маълум қилди.
Унинг сўзларига кўра, бу жараён муайян саъй-ҳаракатларни талаб этган, чунки томонлар техник верификацияни (текширувни) амалга оширишлари ва ҳужжат матнини Ҳиндистон томони билан батафсил мувофиқлаштириб олишлари керак бўлган. Шунга қарамай, бозорга кириш масалаларининг моҳияти бўйича Нью-Деҳли ниҳоятда конструктив ёндашув намойиш этган.
Азизбек Ўрунов Ҳиндистонга Ўзбекистоннинг ташкилотга аъзо бўлишини қўллаб-қувватлагани учун чуқур миннатдорчилик билдирган. У ушбу натижага эришишда Ўзбекистоннинг Ҳиндистондаги элчиси Сардор Рустамбоев ва Ҳиндистоннинг Ўзбекистондаги элчиси Смита Пант, шунингдек, дипломатлар Анитха Нандхини Равинтхеранатх, Гаурав Гупта ва элчи Сентхил Пандианларнинг кўрсатган улкан заҳматларини алоҳида эътироф этган. Имзолаш маросимидан сўнг, Ўзбекистон жамоаси протоколнинг асл нусхаларидан бирини кейинчалик умумлаштириш учун ЖСТ котибиятига юборган.
