Бирлашган Миллатлар Ташкилотининг навбатдаги бош котибини сайлаш жараёни бошланди. Бу ҳақда Reuters хабар берди.
Аъзо давлатлардан 2027 йил 1 январдан лавозимга киришадиган номзодларни кўрсатиш сўралди. 15 нафар аъзодан иборат БМТ Хавфсизлик кенгаши ва 193 аъзоли Бош ассамблея президенти қўшма мактуб орқали номзодларга мурожаат қилди. Бу жараён ҳозирги бош котиб Антонио Гутерришни алмаштириш бўйича пойга расман бошланганини англатади.
Мактубда ҳозиргача ҳеч бир аёл БМТ бош котиби лавозимини эгалламаганига эътибор қаратилган. Шу боис юқори даражадаги қарор қабул қилувчи лавозимларга аёллар ва эркаклар учун тенг имкониятлар яратиш зарурлиги таъкидланиб, давлатлардан аёл номзодларни жиддий кўриб чиқиш сўралган.
Шунингдек, бош котибни танлашда минтақавий хилма-хиллик муҳимлиги қайд этилган. Хавфсизлик кенгаши 2026 йил охирида 10-бош котиб лавозими учун битта номзодни Бош ассамблеяга расман тавсия қилади. Ҳозирча очиқ эълон қилинган номзодлар орасида Чилининг собиқ президенти Мишел Бачелет, Коста Риканинг собиқ вице-президенти Ребеcа Грйнспан ва аргентиналик дипломат Рафаэл Гросси бор.
Сўнгги қарор Хавфсизлик кенгашининг вето ҳуқуқига эга беш доимий аъзоси — АҚШ, Россия, Буюк Британия, Хитой ва Франция — ўзаро келишувга эришганидан кейин қабул қилинади.
