Украинанинг Frontline Robotics дрон ишлаб чиқарувчи компанияси Германияда жанговар учувчисиз учоқлар ишлаб чиқаради. Бу ҳақда Deutsche Welle хабар берди.
Мазкур дронлар Украина томонидан урушда қўлланилади. Гап йилига ўн минглаб дронлар ишлаб чиқариш ҳақида кетмоқда, шартномаларнинг умумий ҳажми эса юз миллионлаб еврони ташкил этади.
Германиянинг Quantum Systems мудофаа компанияси билан жанг майдонида синовдан ўтган “Линза” логистика дрони, Zoom разведка дрони, шунингдек, пулемёт ва гранатомёт билан жиҳозланган масофадан бошқариладиган “Бўрон” ўт очиш модулини ишлаб чиқариш режалаштирилган.
Бунинг учун Quantum Frontline Industries деб номланган қўшма корхона ташкил этилади. У “Украина Қуролли кучлари учун дронлар ишлаб чиқариш бўйича Европадаги биринчи тўлиқ автоматлаштирилган, саноат линияси” бўлади.
Ҳамкорлик Украина ҳукуматининг “Build with Ukraine” (“Украина билан бирга қурамиз”) ташаббуси доирасида йўлга қўйилмоқда. Ушбу ташаббус Ғарб мудофаа компаниялари маҳсулотларини Украинага жалб этиш, шунингдек Украина мудофаа саноатининг бир қисмини хавфсиз Европа давлатларига кўчиришга қаратилган.
Август ойидаги маълумотлагра кўра, Quantum Systems компанияси уруш бошланганидан буён Украина ҳудудидаги махфий ишлаб чиқариш цехларида разведкачи дронлар ишлаб чиқаришни оширган. Жумладан, ойлик суръат икки баробар ошиб, 80 тага етган.
