АҚШ президенти Дональд Трамп Гренландияга сузувчи госпитал юборишини маълум қилди. Сиёсатчи аввалроқ бу оролни АҚШ таркибига қўшиб олмоқчи эканини айтганди. Бу ҳақда Politico хабар берди.
“Луизиана штатининг ажойиб губернатори Жефф Ландри билан ҳамкорликда биз Гренландияга эътиборсиз қолаётган кўплаб касалларга ғамхўрлик қилиш учун катта сузиб юрувчи кема юбормоқдамиз. У йўлда!!!” деб ёзди Трамп X ижтимоий тармоғидаги саҳифасида.
АҚШ президенти Mercy сузувчи госпиталини назарда тутган. У 1986 йилда хизматга қабул қилинган. Кема АҚШ ҳарбий операциялари ва гуманитар миссияларида тезкор тиббий ёрдам кўрсатишга мўлжалланган.
Mercy минг ўринли госпитал бўлиб, унда 61 нафар фуқаролик ходими ва 1 214 нафар ҳарбий хизматчи фаолият юритади. У бутун дунё бўйлаб етакчи сузувчи тиббий платформалардан бири сифатида хизмат қилади.
АҚШ президенти 2025 йил декабрь ойида Жефф Ландрини Гренландия бўйича махсус вакил этиб тайинлаган эди. Ўшанда Трамп Данияга қарашли ҳудудни ўз назоратига олиши ҳақида гапирган. У буни Гренландия АҚШ миллий хавфсизлиги учун муҳимлиги билан изоҳлаганди.
АҚШ Ҳарбий-денгиз кучлари таркибида иккита госпитал кемаси — USNS Mercy ва USNS Comfort мавжуд. Улар ҳарбий миссиялар вақтида қўшинларга тиббий хизмат кўрсатади, шунингдек, табиий офатлар ва гуманитар операциялар чоғида фуқароларга ёрдам беради.
Гренландия, аҳолиси қарийб 57 минг кишини ташкил этадиган орол, АҚШдан тиббий ёрдам сўрамаган. Оролнинг ўз тиббиёт муассасалари мавжуд, оғир беморлар эса самолёт орқали Данияга етказилади. Аввалроқ Дания ҳарбийлари АҚШ сувости кемасининг экипаж аъзоси Гренландия пойтахти Нуукдаги шифохонага ётқизилганини маълум қилган эди. Ушбу ҳодиса Трампнинг сузувчи госпитал юбориш қарори билан боғлиқми-йўқми — ҳозирча аниқ эмас.
