Таиланд ва Камбоджа бош вазирлари Анутин Чарнвиракул ҳамда Хун Манет Малайзияда бўлиб ўтган Жануби-Шарқий Осиё давлатлари ассоциацияси (ASEAN) саммитида мамлакатлар ўртасидаги чегара можаросини тугатиш тўғрисидаги декларацияни имзолади.
Декларацияни имзолаш АҚШ президенти Дональд Трамп иштирокида содир бўлди. У можарони тинч йўл билан ҳал қилишга ёрдам берганди. Томонлар ҳарбий ҳаракатларни тўхтатиш ва яхши қўшничилик муносабатларини ўрнатиш мажбуриятини олди. Келишув шартларига кўра, Таиланд 18 нафар ҳарбий асирни озод қилади, Камбоджа эса чегарадан оғир артиллерияни олиб чиқишни бошлайди. Малайзиялик кузатувчилар ўт очишни тўхтатиш режимига риоя этилишини назорат қилади.
Хун келишув имзоланишини “тарихий кун” деб атади, Чарнвиракул эса бу “мустаҳкам тинчлик учун пойдевор” яратишини айтди.
“Биз кўпчилик қилиш мумкин эмас деб айтган ишни қилдик”, деб таъкидлади Трамп ва урушларни тўхтатишни яхши кўришини қўшимча қилди.
Таиланд ва Камбоджа ўртасидаги қуролли можаро 24 июль куни чегарадаги Преахвихея ва Та Моан Тхом ибодатхоналари атрофидаги ҳудудларнинг кимга тегишлилиги бўйича узоқ давом этган баҳс туфайли бошланди. Тўқнашув беш кун давом этди, камида 35 киши ҳалок бўлди: Таиланд томонидан 22 киши ва Камбоджа томонидан 13 киши. Вазиятга АҚШ президенти аралашди. Малайзия келишувда воситачилик ролини ўз зиммасига олди, шундан сўнг томонлар ўт очишни тўхтатишга келишиб олди.
Маросим Трампнинг Осиё бўйлаб турнеси доирасидаги илк тадбири бўлди. Шунингдек, у Камбоджа билан савдо шартномасини ва Таиланд билан муҳим минераллар тўғрисидаги шартномани имзолади. Бундан ташқари, Бангкок 18,8 миллиард долларга 80 та Америка самолётини сотиб олишга рози бўлди, Пномпен эса авиация секторини қўллаб-қувватлаш учун Boeing билан ҳамкорлик қилади.
Бундан ташқари, Трамп Малайзия билан келишув тузди ва уни “катта савдо битими” деб атади. У ушбу мамлакатнинг келгуси ўн йил ичида АҚШга 70 миллиард доллар сармоя киритиш мажбуриятини ўз ичига олади. Кейинчалик Трамп Япония, Жанубий Кореяга ташриф буюриб, Хитой раҳбари Си Цзиньпин билан учрашмоқчи, ундан Россия ва Украина ўртасидаги урушни тугатишда ёрдам беришни сўрайди.
