Халқаро футбол федерацияси (FIFA) ва YouTube видеоплатформаси 2026-йилги жаҳон чемпионати арафасида ҳамкорлик битимини тузди. Бу ҳақда ташкилот матбуот хизмати ўзининг X (собиқ Twitter) ижтимоий тармоғидаги саҳифасида маълум қилди.
Ушбу ҳамкорлик учрашувларни трансляция қилиш ҳуқуқига эга бўлган телекомпанияларга ўйинларни YouTube орқали жонли эфирда намойиш этиш имконини беради. Келишувнинг асосий мақсади — ёш томошабинлар аудиториясини жалб қилишдир.
Белгиланган тартибга кўра, трансляция ҳуқуқи эгалари Жаҳон чемпионати ўйинларининг дастлабки 10 дақиқасини YouTube платформасида бепул кўрсатишади. Бу орқали ёш мухлисларни учрашувнинг қолган қисмини анъанавий телеканаллар орқали томоша қилишга ундаш кўзда тутилган. Шунингдек, компаниялар айрим танланган ўйинларни тўлиқ ҳажмда ўз каналларида намойиш этишлари ҳам мумкин бўлади. Келишувнинг молиявий тафсилотлари очиқланмаган.
Маълумот учун, 48 та жамоа иштирокидаги навбатдаги Жаҳон чемпионати 11 июндан 19 июлга қадар давом этади. Турнирга учта мамлакат — АҚШ, Мексика ва Канада мезбонлик қилади. Мусобақанинг амалдаги ғолиби Аргентина терма жамоаси ҳисобланади.
