Тошкент шаҳрида енгил табиатли аёлларга “раҳнамолик” қилиб туриш учун ҳар ой 400 доллардан пора олган ички ишлар ходими жиноий жазога тортилди.
Суд ҳужжатларида келтирилишича, у “Истамбул сити” турар-жой мажмуасида интим хизмат кўрсатувчи аёлларга нисбатан чора кўрмаслик, уларни ҳуқуқни муҳофаза қилувчи органларнинг “Орият” рейдлари ҳақида олдиндан огоҳлантириб туриш ва “раҳнамолик” қилиш эвазига ҳар ой 400 доллар талаб қилган.
Маълум бўлишича, 2025 йилнинг 28 ноябрь куни ДХХ ва ИИВ ходимлари ҳамкорлигида ўтказилган тезкор тадбирда инспектор фоҳишадан 400 АҚШ долларини олаётган вақтида ушланган. Марказий банк курси бўйича ушбу маблағ 4 млн 747 минг 200 сўмни ташкил қилган.
Судда аёл профилактика инспектори аввал ҳам қизларнинг фоҳишалик фаолиятига кўз юмиб келиш, рейдлар ҳақида огоҳлантириш ва маъмурий баённома тузмаслик эвазига турли миқдорда пуллар олганини айтган.
Инспектор судда айбини қисман тан олиб, пулни олганини тасдиқлаган, аммо пора талаб қилмаганини билдирган. Унинг айтишича, пулни аёлнинг ўзи таклиф қилган.
Жиноят ишлари бўйича Миробод туман суди ҳукми билан Яккасарой тумани ИИО ФМБ 4-сонли ИИБ ҲПБ профилактика катта инспектори пора олишда айбли деб топилган.
Суд дастлабки терговдаги “тамагирлик йўли билан пора олиш” айбловини нотўғри деб топиб, айбни Жиноят кодексининг 210-моддаси (пора олиш) 1-қисмига қайта ўзгартирган.
Ҳукмга кўра, инспектор 2 йил муддатга ички ишлар органларида ишлаш ҳуқуқидан маҳрум қилиниб, 4 йилга озодликдан маҳрум этилган. Жазо манзил-колонияда ўталиши белгиланган.
